Қазақстан Президенті Астанада дауыс бергеннен кейін журналистердің келесі президенттік сайлауға қатысу ықтималдығы туралы сұрағына жауап берді.
Қасым-Жомарт Тоқаев Конституциялық соттың тиісті шешім қабылдағанын айтып, оның заңды екенін атап өтті. Сонымен бірге ол өзінің заңды тәртіппен қайта сайлану құқығы бар екенін жеткізді.
Алайда Мемлекет басшысы алдағы сайлау, не өзі оған түсетін-түспейтіні туралы қазір нақты айту ерте екенін айтты.
«Біз еліміздің алдында тұрған өте көп міндетті орындауымыз керек, іс жүзінде бүкіл Қазақстанды үлкен құрылыс алаңына айналдыруымыз қажет, ең алдымен азаматтарға арналған әлеуметтік нысандар салу керек. Осы мақсатта Ұлттық қорды пайдалануға дайынмын. Халық игілігіне жұмсауға болатын қаражатты неге шетелдегі бағалы қағаздарда ұстаймыз? Меніңше, оларды халыққа, азаматтарымызға қызмет еткізу керек», — деді Президент.
Тоқаев халықаралық ахуалдың күрделі екенін де атап өтіп, жағдайды ұдайы талдап отыру қажет екенін айтты. Оның сөзінше, Қазақстан қиын сыртқы ортаға қарамастан ішкі тұрақтылықты сақтап, дамуын жалғастырып келеді.
Президент келесі сайлауға қатысуы туралы сұраққа нақты жауапты кейінірек беретінін айтып, бұл тақырыпты келесі жылы жалғастыруға болатынын жеткізді.
