Қазіргі таңда мектеп оқушылары арасындағы буллинг күрделі әлеуметтік проблемаға айналды. Психологтардың пікірінше, буллингтің басты себептері – тәрбиедегі кемшіліктер, әлеуметтік желілердегі агрессия және балалар арасындағы түсініспеушіліктер.
№111 мектептің психологы Жадыра Ахтанова бұл мәселе кейде балалар тарапынан дұрыс түсінілмейтінін айтады:
"Кейбір оқушылар қалжыңдасу мен буллингтің айырмашылығын ажырата алмайды. Мектеп – баланың әлеуметтену ортасы, онда балалар ойнап, бір-бірімен қарым-қатынас жасайды. Алайда кейбір ата-аналар баласына: ‘Саған кім тиді? Не істеді? Сен қалай жауап бердің?’ деп, жағдайды одан әрі ушықтыруы мүмкін."
ҚР Ішкі істер министрлігінің мәліметінше, былтыр буллингке қатысты 182 құқықбұзушылық тіркелсе, биыл үш айдың ішінде 54 адам жауапкершілікке тартылды. Көп жағдайда сот шешімімен ата-аналарға ескерту жасалады, бірақ кей кездері айыппұл да салынады.
"Ата-аналар өз жауапкершіліктерін мұғалімдер мен құқық қорғау органдарына жүктемеуі керек. Баланың болашағы үшін бірінші кезекте ата-ана жауапты" , - дейді ҚР ІІМ Әкімшілік полиция комитеті басқарма басшысының орынбасары Жасұлан Жұманалин.
Қаңтар айынан бастап мектептер мен колледждерде балалар құқығын қорғау және оларға психологиялық қолдау көрсету мақсатында "111" байланыс орталығының QR-коды енгізілді. Былтыр бұл орталыққа 1000-ға жуық бала көмек сұрап жүгінген.
Сонымен қатар, өткен жылы елімізде буллингке қарсы екі бағдарлама пилоттық режимде енгізілді – Финляндиядан әкелінген "KiVa" және отандық "Досболайқ".
"Бұл бағдарламалардың алғашқы нәтижелерін мамыр айында жарияланады. Содан кейін әр мектеп өзіне қолайлысын таңдап, жаңа оқу жылында енгізеді,-дейді ҚР Оқу-ағарту министрлігі Балалардың құқықтарын қорғау комитеті төрағасының орынбасары Юлия Овечкина:
Мамандардың айтуынша, буллингті жою үшін ата-ана, мектеп және қоғам бірге әрекет етуі тиіс.