Полковник Құсайыновтың қайтыс болғаны туралы ақпаратты облыстық полиция департаментінің баспасөз қызметі растады. Ведомствоның мәліметінше, Бекжан Құсайынов еңбек демалысында болып, көлік жүргізген. Оқыс оқиға Қарқаралы маңында болған. Сірә, жүргізуші көлікті басқара алмай, күрт бұрылыста шұңқырға ұшып кеткен.
«Қарағанды қалалық полиция департаменті бастығының орынбасары, полиция полковнигі Бекжан Төлеуұлы Құсайыновтың 53 жасында кенеттен өмірден озғанын қайғырып хабарлаймыз. Ол өмірінің 30 жылдан астамын Отанға адал қызмет етуге, қоғамдық қауіпсіздікті қамтамасыз етуге және құқық тәртібін қорғауға арнады», - деп хабарлады Қарағанды облысы полиция департаментінің баспасөз қызметі.
Бекжан Құсайынов қызметін 1992 жылы Қарағанды облысы Қарқаралы аудандық ішкі істер басқармасының патрульдік-күзет қызметінде полиция қызметкері болып бастаған. Ол осы жылдар ішінде Қарағанды қалалық ІІБ бастығының орынбасары лауазымын қоса алғанда жауапты қызметтерді атқарып, мансап сатысының барлық баспалдақтарын басып өтті.
«Ол әрқашан өзінің жоғары кәсіби дайындығымен, өзіне және әріптестеріне деген талапшылдығымен, инабаттылығымен, әдептілігімен және адамдарға құрметпен қарауымен ерекшеленетін. Полиция полковнигі Құсайынов қызметке адал, антына адал, шыншыл, жанашыр тұлға болды. жеке құрам марқұмның туыстары мен жақындарына шын жүректен көңіл айтады», - деп толықтырды ведомство.