Қысқы сапарға шықпас бұрын, ауа райын міндетті түрде тексеру қажет. Ауа райын тексеру үшін ресми метеорологиялық сайттарды немесе мобильді қосымшаларды пайдаланыңыз. Егер қарлы боран, қатты жел немесе өте төмен температура күтілсе, сапарды мүмкіндігінше кейінге қалдырған дұрыс. Алайда, сапарды кейінге қалдыру мүмкін емес болса және сапар өте маңызды болса, мұқият дайындықтың маңызы зор.
Жолға шығарда алатын заттардың тізімі:
- Қосымша жанармай: Жанармайдың мөлшері сапардың ұзақтығына және ауа райына байланысты болуы керек. Әдетте, бак толтырып жүру ұсынылады.Дегенмен қосымша арнайы канистрде болғаны абзал. Бұл ұзақ уақыт күтуге тура келген жағдайда көлікті жылытуға және қозғалуға қажет.
- Жылы көрпе мен термиялық киімдер: Сыртта боранға түсіп қалсаңыз, жылы киімдер мен көрпе суықтан қорғануға мүмкіндік береді.
- Қосымша жылы аяқ киім мен қолғаптар: Аяқ пен қолдың тез мұздауы мүмкін, сондықтан оларды жылы ұстау үшін қосымша қолғап пен аяқ киім міндетті.
- Шам және батареялар: Қараңғыда жарық қажет болған жағдайда қосымша шам мен батареялар пайдалы.
- Қар күрегі: Көлік маңындағы қарды тазалау үшін күрек қажет.
- Тамақ және су қоры: Боран кезінде құтқару қызметі келгенше бірнеше сағат немесе тіпті тәулік бойы күтетін жағдайлар болуы мүмкін, сондықтан ұзақ уақыт сақталатын тамақ пен су қоры болуы тиіс.
- Зарядталған қуат банкі (power bank): Ұялы телефонды зарядтау үшін қуат банкі қажет, себебі байланыс сіздің аман қалуыңызға маңызды рөл атқарады.
- Құм немесе тұз: Көлікті мұзды немесе қарлы жерде жылжыту үшін құм немесе тұз пайдаланылады.
- Алғашқы көмек қобдишасы: Қажет болған жағдайда алғашқы көмек көрсетуге арналған құралдар болуы тиіс.
- Көкшіл немесе қызыл шүберек: Бұл шүберекті көліктің антеннасына байлап қою арқылы құтқарушыларға сіздің орныңызды көрсетуге болады.
Боран кезінде не істеу керек?
Қарлы боранға түсіп қалған жағдайда ең маңыздысы – сабыр сақтап келесі ұсыныстарды орындаған абзал:
- Көлікті жолдан алшақтатып, мүмкіндігінше желден қорғанатын жерге қойыңыз. Авариялық сигнал шамдарын қосыңыз, бұл басқа жүргізушілерге сіздің орныңызды көрсетеді.
- Боран кезінде көліктен шығу өте қауіпті болуы мүмкін, себебі бағытты жоғалтып, адасу ықтималдығы жоғары. Көлік сізге қорғаныш және жылу сақтаудың ең тиімді құралы болып табылады.
- Қозғалтқышты әр сағат сайын 10 минутқа қосып қойыңыз. Бұл кезде ауаның температурасына байланысты қозғалтқышты ұзағырақ немесе қысқарақ уақыт қосуға болады, бірақ газ шығатын жердің қармен бітелмегенін тексеру өте маңызды. Газ шығатын жердің бітелуі улы газдың көлік салонына кіруіне әкелуі мүмкін, бұл өмірге қауіпті.
- Көліктің антеннасына ашық түсті шүберек байлап қойыңыз немесе шамды қосып қойыңыз. Бұл құтқарушыларға сіздің орныңызды тезірек табуға көмектеседі.
- Денеңіздегі жылуды сақтау үшін барлық көрпелер мен киімдерді пайдаланыңыз. Суықтан қорғау үшін бәрін бір жерде сақтаңыз және жылы болуға тырысыңыз. Сонымен қатар, салонда аз да болса қозғалыс жасап, қол-аяқты созып жаттығулар жасаңыз.
- Егер байланыс мүмкіндігі болса, 112 құтқару қызметіне хабарласыңыз. Өзіңіздің орналасқан жеріңізді нақты айтып, жағдайыңызды түсіндіріңіз.
Бораннан кейінгі әрекеттер
Боран басылғаннан кейін көлікті және жолды мұқият тексеріңіз. Сонымен қатар, ауа райы болжамын қайта қарап, алдағы уақыттағы жағдайды білу өте маңызды, себебі боран қайталануы мүмкін. Көліктің барлық жүйелерінің дұрыс жұмыс істейтініне көз жеткізіңіз. Егер көлікті әрі қарай жүргізу қауіпті болса, көмек күтуге тырысыңыз немесе тек қауіпсіз жағдайда ғана қозғалыс жасаңыз.
Бораннан кейін жолдардың тайғақ болуы мүмкін, сондықтан өте сақтықпен және баяу жүріңіз. Көлікті басқару қиын болса, тежегішті бірден баспаңыз, керісінше, жылдамдықты біртіндеп азайтыңыз.
Қорытынды
Қысқы боран кезінде жолда қалу – әрдайым қиын және қауіпті жағдай. Дегенмен, дұрыс дайындық, сабыр сақтау және қажетті шараларды орындау сіздің аман қалуыңызды қамтамасыз етеді. Қауіпсіздік – бірінші кезекте, сондықтан сапарға шығар алдында барлық қажетті заттарды дайындап, ауа райын мұқият тексеріңіз. Есіңізде болсын, қауіпсіздік – өз қолыңызда, және тиісті дайындық сізді көптеген қауіпті жағдайлардан сақтауға көмектеседі.