Қарағандыда үйлердің бірінің кіре берісіне суықта тастап кеткен кішкентай сәбидің ата-анасы табылды,- деп хабарлайды newsroom.kz порталы Қарағанды облысы полиция баспасөз қызметіне сілтеме жасап.
Абырой болғанда, суықта жатқан баланы тез арада байқап, құтқарып қалған. Бүгін, 2024 жылдың 28 ақпанында сәбидің ата-анасы табылды.
Қарағанды облысы полициясының баспасөз қызметі қазіргі уақытта барлық мән-жай анықталып жатқанын түсіндірді.
"Қабылданған шаралардың нәтижесінде полицейлер балаға қауіп төндірді деген күдікпен 29 жастағы ер адам мен 22 жастағы әйелді анықтады,- деді Қарағанды облысының полиция департаменті бастығының орынбасары Ернат Қалиақпаров.
Тергеу мүддесі үшін басқа мәліметтер де жарияланбайды.
Нәрестенің ата-анасын табуға төрт күн кетті. Сәби 2024 жылдың 24 ақпанында Қарағандының оңтүстік-шығыс секторындағы үйлердің бірінің кіреберісінен табылды.