Президент тапсырмасымен құрылған комиссия Қазақстанның Қорғаныс министрлігін кешенді тексерудің аралық қорытындысын ұсынды. Тексеру ведомствоға қарасты 104-тен астам нысанды қамтыды, ал анықталған кейбір бұзушылықтар бойынша сотқа дейінгі тергеулер басталды.
Комиссия әскери қызметшілердің қауіпсіздігіне және әскери қызмет өткеру жағдайларына ерекше назар аударып отыр. Сондай-ақ азық-түлік пен киім-кешекпен қамтамасыз ету сапасы, медициналық көмек көрсету және мемлекеттік мүліктің сақталуы тексерілуде.
Сонымен қатар бюджет қаражатын пайдалану тиімділігіне де аудит жүргізіліп жатыр.
«Қазіргі таңда қылмыстық қудалау органдарының қарауында 37 іс бар, тергеу мүддесіне байланысты бұл істер бойынша мәліметтер әзірге жария етуге жатпайды», — делінген хабарламада.
Тексеру «Заң және тәртіп» қағидаты аясында жүргізіліп, Қарулы Күштердің жауынгерлік әзірлігін қамтамасыз ету және әскери тәртіпті нығайтуға бағытталған жүйелі шаралар әзірлеуді көздейді.
Комиссияның ұсынымдары әскери реформаны жүзеге асыру барысында да пайдаланылып жатыр. Комиссия жұмысы қараша айында аяқталады.
Қорғаныс министрлігін кешенді тексеру жөніндегі комиссия қыркүйек айының соңында Президент Қасым-Жомарт Тоқаевтың тапсырмасымен құрылған еді. Бұған Каспийдегі оқу-жаттығу кезінде 14 әскери қызметшінің қаза табуы себеп болды.
