Президент Қасым-Жомарт Тоқаев Қазақстанның көші-қон саясатын одан әрі жетілдіру қажет екенін айтты. Мемлекет басшысы үкіметке тиісті заң жобасын Мәжіліске қысқа мерзім ішінде енгізуді тапсырды.
Тоқаевтың айтуынша, Қазақстан елге жоғары білікті мамандарды, озық технологияларды және шетелдік капиталды тарту үшін жүйелі шаралар қабылдап жатыр. Осы бағыттағы құралдардың бірі ретінде «Алтын виза» енгізілген.
«Алтын визаны» енгізу осы үдеріске қуатты серпін беруге тиіс. Сонымен қатар көші-қон саясатын жетілдіру қажет. Үкімет тиісті заң жобасын депутаттардың қарауына ұсынуы керек. Өз кезегінде олар құжатты барынша қысқа мерзімде қарап шығуға тиіс», — деді Президент Құрылтай сессиясында.
Бұған дейін Тоқаев «Алтын виза» иелері мен олардың отбасы мүшелеріне қандай мүмкіндіктер қарастырылғанын айтқан еді. Оның сөзінше, Қазақстанда көші-қон рәсімдері жеңілдетіліп, толық цифрландырылып жатыр.
Бұл елдің өңірлік хаб ретіндегі орнын нығайтып, шетелдік мамандар мен инвесторлар үшін қолайлы жағдай жасауға бағытталған. «Алтын виза» ұзақ мерзімді тұруға құқық береді, сондай-ақ иелеріне салықтық жеңілдіктер мен артық әкімшілік жүктемеден босату сияқты преференциялар қарастырылған.
Президент отбасы мүшелеріне қатысты да жағдайды атап өтті. «Алтын виза» иелері мен олардың отбасы мүшелері біздің азаматтармен бірдей сапалы білім мен медицинаға кедергісіз қол жеткізеді», — деді ол.
Ішкі істер министрлігінің мәліметінше, 2026 жылғы наурыздың басында Қазақстанда тұруға ықтиярхаты бар 240 мыңнан астам шетелдік тұрақты тұрып жатқан. Олардың 97,5 мыңы — Ресей азаматтары, бұл жалпы санның 40,4 пайызына тең.
