Университеттің міндеті өзгеріп жатыр
Қазіргі университеттің рөлі тек дәріс оқып, емтихан қабылдаумен шектелмейді. Жаңа технологиялар мен еңбек нарығындағы өзгерістер жоғары оқу орындарын да жаңа тәсілдерге көшуге мәжбүрлеп отыр. Ualikhanov University өз дамуында өңірдің қажеттіліктеріне сүйенуді көздейді. Ақмола облысында ауыл шаруашылығы, өнеркәсіп, туризм және басқа да салалар дамып келе жатқандықтан, осы бағыттарға қажет мамандарды даярлау маңызды. Сондықтан оқу бағдарламаларын қалыптастыруға жұмыс берушілер, мемлекеттік органдар мен бизнес өкілдері де қатысады. Мұндай тәсіл студенттің теориялық білімін өндірістегі нақты тәжірибемен ұштастыруға мүмкіндік береді.
Студент жұмысты диплом алғаннан кейін ғана іздемейді
Университет студенттері оқу барысында өңірдегі түрлі кәсіпорындарда тәжірибеден өтеді. Олардың қатарында «Тыныс» АҚ, «Altyntau Kokshetau» АҚ, «Көкшетау минералды сулары» АҚ, «Семизбай-U» ЖШС, «Гормолзавод» ЖШС, «Қазақстан астық консорциумы» ЖШС және «RG Gold» АҚ бар. Бұл серіктестік тек практикадан өтумен шектелмейді. Кәсіпорындар студенттерге гранттар мен атаулы стипендиялар ұсынып, мамандар даярлау процесіне қатысады. Нәтижесінде студент үшін «оқу – тәжірибе – жұмыс» байланысын қалыптастыруға жағдай жасалады. Қазір университетте бакалавриаттың 74, магистратураның 42, докторантураның 10 білім беру бағдарламасы және резидентура бағдарламасы бар. 8 мың студент жасанды интеллект бойынша білім алды
Университеттегі маңызды бағыттардың бірі — жасанды интеллект.
AI SANA ұлттық бағдарламасының алғашқы кезеңінде Ualikhanov University-дің 7 764 студенті жасанды интеллект бойынша базалық курстардан өтті. Олар Huawei, Coursera және Astana Hub платформалары арқылы цифрлық технологиялардың негіздерін меңгерген.
Бағдарламаның келесі кезеңіне 2 684 студент өтті. Оның барысында қатысушылар AI негіздерімен қатар кәсіпкерлік, заманауи технологиялық трендтер, нақты кейстер және дизайн-ойлау бағыттарын оқыды. Яғни мақсат — студентке жасанды интеллект туралы теориялық түсінік беру ғана емес, оны нақты жобалар жасауға пайдалана білуге үйрету.
Студенттер AI жобаларын жасап жатыр
Бұл бағыттың нәтижесі ретінде университетте жасанды интеллектке негізделген бірнеше жоба әзірленген. Олардың қатарында студенттер мен оқытушыларға арналған онлайн кеңесші, қабылдау комиссиясының көмекшісі, техникалық қолдау чат-боты және психологиялық қолдау көрсететін Zhanym AI жобасы бар. 2026 жылы университетте AI-Sana аясында стартап жобалар байқауы да өтті. Байқауда студенттер AI негізіндегі мессенджер мен бұлтты сақтау платформасынан бастап, тамақтануды бақылауға арналған AI-көмекші, көру қабілеті бұзылған адамдарға арналған ақылды көзілдірік және білім беру платформаларына дейінгі жобаларын ұсынған.
Ғылымға бөлінетін қаржы бірнеше есеге өскен
Университеттің тағы бір бағыты — ғылымды нақты өндіріспен байланыстыру. 2025 жылы оқу орнындағы ғылыми жобаларды қаржыландыру көлемі 1 млрд 645 млн теңгеден асқан. Ғылыми жұмыстардың бір бөлігі өңірдегі кәсіпорындардың нақты сұранысына бағытталған. Мысалы, университет ғалымдары өндірістік процестердің сапасын арттыру, техникалық суды тазарту және алтын өндіру тиімділігін жоғарылату сияқты бағыттарда зерттеулер жүргізіп келеді. Бұл жерде ғылым тек зертханада қалып қоймай, кәсіпорындардың нақты мәселелерін шешуге бағытталмақ.
Ауыл шаруашылығы да зерттеудің негізгі бағыты
Ақмола облысы үшін ауыл шаруашылығы маңызды болғандықтан, университет ғылыми жұмыстарында бұл салаға да көңіл бөлінген. Зерттеулер ауыл шаруашылығы өнімділігін арттыруға, жемшөп өндірісін жетілдіруге, өсімдік шаруашылығын цифрландыруға және ресурстарды тиімді пайдалануға бағытталады. Мұндай жобалардың ерекшелігі — ғылыми нәтижені өңір экономикасына енгізу.
Шетелдік университеттермен бірлескен бағдарламалар бар
Студенттерге халықаралық тәжірибе жинауға да мүмкіндік қарастырылған. Ualikhanov University халықаралық рейтингтерге қатысып келеді. Қазіргі мәлімет бойынша университет QS Asia University Rankings 2026 рейтингінде 781–790 орындар аралығында тұр. Сонымен қатар оқу орнында үш қосдипломды және бірлескен білім беру бағдарламасы бар. Шетелдік жоғары оқу орындарымен бірлескен бағдарламалар студентке білімін басқа елде жалғастырып, халықаралық академиялық ортада тәжірибе жинауға мүмкіндік береді.
Университет қабырғасындағы жағдай да маңызды
Студенттің болашағына тек оқу бағдарламасы емес, күнделікті ортасы да әсер етеді. Осы бағытта университет өз қаражаты есебінен 500 орындық екі жаңа жатақхана пайдалануға берген. Сонымен бірге оқу орнында өмір бойы білім алу тұжырымдамасы дамып келеді. Яғни университет тек мектеп бітірушілерге емес, кәсіби біліктілігін арттырғысы келетіндерге және аға буын өкілдеріне де білім алу мүмкіндігін ұсынуды көздейді.
Ең бастысы — технология емес, оны қолданатын адам
Жасанды интеллект, халықаралық бағдарламалар, жаңа зертханалар мен өндірістік жобалар университеттің мүмкіндігін кеңейтіп отырғанымен, жоғары білімнің негізгі мақсаты өзгермейді. Студент университеттен тек мамандық бойынша білім алып шықпай, өз білімін нақты мәселелерді шешуге пайдалана алатын, жаңа технологияны меңгерген және жауапкершілікпен шешім қабылдайтын маман болуы керек. Сондықтан болашақ университеттің нәтижесін тек диплом саны немесе рейтингпен өлшеу жеткіліксіз. Оның басты көрсеткіші — түлектің алған білімін жұмысында, ғылымда немесе кәсіпкерлікте қаншалықты тиімді пайдалана алатыны.
Ualikhanov University-дің қазіргі бағыты да осы өзгерісті көрсетеді: білім — тәжірибемен, ғылым — өндіріспен, ал технология — адамның мүмкіндігімен байланысуы керек.
