Шымкент қаласында құқық қорғау органдары тұрақты қылмыстық топтың қызметін тоқтатты. Тергеу мәліметінше, топ мүшелері ақшаға шетелдіктердің Қазақстан аумағына кіруін ұйымдастырып, оларды заңсыз түрде тіркеумен айналысқан.
Арнайы операция прокуратураның үйлестіруімен жүргізілді. Барлығы 28 тінту шарасы өтіп, олардың барысында ондаған шетелдік паспорттар, электронды құрылғылар, ұялы телефондар, сондай-ақ жалған құжаттар мен фиктивті еңбек келісімшарттары тәркіленді.
Сонымен қатар, ірі көлемде қолма-қол ақша мен тіркелмеген қару табылғаны белгілі болды. Қылмыстық топтың ұйымдастырушысы уақытша ұстау изоляторына қамалды, тағы 13 адам полицияға жеткізілді.
Аталған дерек бойынша заңсыз көші-қонды ұйымдастыру бабымен сотқа дейінгі тергеу басталды.
