Қыстың ызғары сейіліп, табиғат қайта түлейтін шақта келетін Наурыз – жаңару мен жақсылықтың бастауы. Күн мен түн теңесіп, тіршілік жанданып, адамдар бір-біріне ізгі тілектерін арнайды. Сондықтан бұл мереке қазақ үшін әрдайым ерекше мәнге ие.
Шетелдегі қандастар да бұл күнді үлкен ықыласпен қарсы алады. Солардың бірі – Моңғолиядағы қазақ қауымы. Бұл елде шамамен 200 мыңға жуық қазақ тұрады, олардың басым бөлігі Баян-Өлгий аймағында шоғырланған. Ұлттық салт-дәстүрді сақтаған өңірде Наурыз мейрамы айрықша сән-салтанатпен өтеді.
Мереке қарсаңында әр отбасы үй-жайын ретке келтіріп, тазалық жұмыстарын жүргізеді. Наурыз күні дастарқан жайылып, басты тағам – наурыз көже әзірленеді. Қазанға қыстан сақталған сүр ет, қазы-қарта, жал-жая салынып, молынан ас дайындалады.
Бұл күні ауыл тұрғындары бір-бірінің үйіне қонаққа барып, көже ішіп, ақ тілектерін білдіреді. Ақсақалдар төрге шығып, батасын береді. Адамдар «қыстан аман шықтың ба?» деп хал сұрасып, құшақ жая көріседі.
Наурыз мейрамы тек елді мекендерде ғана емес, алыс жайлауларда да ерекше атап өтіледі. Мал бағып отырған отбасылар да бұл күнді құр жібермей, қазан асып, балаларымен бірге қуанышқа бөленеді.
Жалпы, Моңғолия қазақтары үшін Наурыз – табиғаттың жаңаруымен қатар, ұлттық бірлікті нығайтатын, ата дәстүрді дәріптейтін маңызды мереке. Бұл күн – өткен мен бүгінді жалғап, болашаққа сеніммен қарауға үндейтін рухани құндылықтардың айқын көрінісі.
