Депутаттың сөзінше, парламентке Roblox-тың балалардың психикалық дамуына кері әсері болуы мүмкін екені туралы көптеген шағым түсуде. Атап айтқанда, ойынға тәуелділік қалыптастырып, агрессияны арттырып, баланың шынайы өмірге қызығушылығын төмендетеді деген уәж айтылған.
«Roblox сияқты ашық онлайн-платформаларда алаяқтар мен педофилдер көп. Олар алдымен ойын ішіндегі чат арқылы баланың сеніміне кіреді, кейін Telegram-ға көшіріп, құпия кездесулерге шақырады. Мұның соңы қайғылы жағдайларға әкелуі мүмкін», – деді депутат.
Roblox өз кезегінде платформаның қауіпсіз екенін мәлімдейді. Алайда депутаттар миллиондаған қолданушысы бар жүйені толық бақылау мүмкін емес екенін алға тартады. Унзила Шапак кейбір елдерде Roblox-қа қатысты шектеу шаралары енгізілгенін еске салды. Мәселен, Ресейде платформаға тыйым салынған.
Сонымен қатар, мәдениет және ақпарат вице-министрі Евгений Кочетов бұған дейін Қазақстанда Roblox-ты бұғаттау немесе шектеу мәселесі қарастырылмайтынын айтқан.
Дегенмен депутат бұл тақырыптың балалар қауіпсіздігі мен ата-аналардың сеніміне тікелей қатысы бар екенін атап өтіп, мемлекет тарапынан ашық әрі нақты ұстаным қажет екенін мәлімдеді.
