Оның айтуынша, стационар бастапқыда 288 төсекке есептелген. Алайда күрт артқан жүктемеге байланысты төсек қоры 453-ке дейін кеңейтілді, оның 243-і — вирустық инфекциямен түскен балаларға арналған.
Тәулігіне стационардың қабылдау бөліміне 450–500-ге дейін тұрғын жүгінеді. Солардың тек 20–25%-ы ғана ауруханаға жатқызуды қажет етеді, ал қалғандары дәрігер кеңесін алып, үй жағдайында емделеді.
«Қажет болған жағдайда біз төсек санын 550-ге дейін жеткізуге дайынбыз. Барлық резервтеріміз және дәрі-дәрмекпен қамтамасыз етуіміз толық», — деді Абдуов.
Сонымен қатар ол ата-аналарды қабылдау бөлімінде кезекке жиналмауға шақырды, себебі адамдардың шоғырлануы өзге инфекциялармен айқаспалы жұқтыру қаупін күшейтеді.
Дәрігерлер ауру белгілері пайда болғанда учаскелік мамандарға, емханалардағы фильтр-кабинеттерге немесе шұғыл көмек бөлімшелеріне жүгінуді, қажет болса мобильді бригада шақыруды ұсынады.