Облыста сырқаттанушылық өсіп жатыр, сондықтан барлық білім беру мекемелеріне санитарлық талаптарды күшейту тапсырылған. Мектептерде таңертеңгі сүзгі ұйымдастырылған: қызметкерлер мен оқушыларды визуалды тексеруден өткізіп, қажет жағдайда дене қызуы өлшенеді.
Жөтел, тұмау, мұрын бітуі, дене қызуының көтерілуі сияқты белгілері бар балалар бірден арнайы бөлмеге жеткізіліп, кейін үйлеріне қайтарылады.
Білім беру ұйымдары әр үш сағат сайын кабинеттерді желдетіп, ылғалды тазалық жүргізуге, температуралық режимді сақтауға және санитарлық құралдардың қолжетімділігін қамтамасыз етуге міндетті. Бірқатар мектептерде бұқаралық шаралар уақытша тоқтатылып, кейбірінде маска тағу режимі енгізілген.
Клара Құлатаева атап өткендей, 20 қараша 2025 жылғы №1 бас санитариялық дәрігер қаулысына сәйкес, егер бір сыныптың 30%-дан астамы сырқаттанса, онда оқу тобы жағдай тұрақталғанға дейін қашықтан оқыту форматына ауыстырылады. Медициналық қызметтер балалардың денсаулығын және мектепке келу көрсеткішін күн сайын бақылауда ұстап отыр.
Ата-аналарға аурудың алғашқы белгілері байқалғанда баланы мектепке әкелмеу, ал жазылғаннан кейін міндетті түрде медициналық анықтама ұсыну ескертілді. Сондай-ақ баланың сабаққа келмеу себебін сынып жетекшісіне ата-ананың өзі хабарлауы тиіс.
Білім басқармасы: «Балалардың денсаулығы – басты міндет. Сондықтан ата-аналарды профилактикалық шараларға түсіністікпен қарап, ауырып тұрған баланы мектепке жібермеуге шақырамыз», – деп үн қатты.