Кеше Таразда автобус аялдамасынан бір қызды күшпен көлікке отырғызып, белгісіз бағытқа алып кеткен. Оқиға куәгерлері онға жуық адам болғанына қарамастан, қылмыскер қызды сүйреп әкеткен.
Жанашыр тұрғындар қылмыскерді тоқтатуға тырысқан: көлік есіктерін ұстап, рөлге отыруына жол бермей, жәбірленушіні сыртқа шығарып алмақ болған. Дегенмен күдікті қызды бәрібір алып қашып кеткен.
Алдын ала болжам бойынша, ол қызды неке қию мақсатында әкеткен.
Жамбыл облысының полиция департаменті Қылмыстық кодекстің 125-бабы — «Адам ұрлау» бойынша тергеу басталғанын хабарлады.
«Оқиғаға қатысы бар тұлғалардың барлығы анықталып, жауап алынды. Тараптар бұрыннан таныс екені және бір-біріне шағымы жоқ екені белгілі болды», — деді ведомство өкілдері.
Соған қарамастан, тергеу жұмыстары жалғасуда. Себебі шағымның болмауы қылмыстық істі тоқтатуға негіз емес — полиция заң аясында істі соңына дейін зерттеуге міндетті.