Зерттеушілердің мәліметінше, бұл аймақ құрлықтық палеозойдың пермь кезеңіне жатады – яғни, динозаврлар дәуіріне дейінгі уақыт. Мұнда алғаш рет ежелгі жануарлардың іздері өткен ғасырдың 60–70 жылдары табылған. Кейін зерттеу тоқтап қалған, себебі нысанның нақты координаттары жоғалған болатын. Оларды ғалымдар жақында ғана 50 жыл бұрынғы далалық күнделіктердің жазбалары арқылы қайта тапқан.
«Біз бұрынғы экспедициялардың деректерін қалпына келтіріп, қазба орнының орнын анықтадық. Нәтижесінде Utegenia shpinari түріне жататын ежелгі қосмекенділердің жүзден астам қаңқасы табылды», – дейді Зоология институтының мамандары.
Утегениялар — шамамен 30 сантиметрге дейін өсетін, сыртқы түрі тритон мен саламандраға ұқсас ежелгі құйрықты қосмекенділер. Жас даралары аксолотль секілді сыртқы желбезекке ие болған.
Сонымен қатар, ғалымдар ежелгі өсімдіктердің іздерін, соның ішінде ағаш тәрізді қырықбуын — каламиттердің қалдықтарын тапқан.