Қаржы мониторингі агенттігі олардың әрекетін елді қанау деп бағалап, заңсыз табыс көзін жабуға кіріскен.
«Олар құмарлықты насихаттап, заңды белден басып қана қоймай, халықтың қалтасын қағып, қаншама отбасының шаңырағын шайқалтты», – дейді ведомство өкілдері.
Тексеру барысында рэпер Baller (шын аты – Шыңғысхан Көпбаев) биылдың өзінде бес рет әкімшілік жауапқа тартылғаны белгілі болды.
Ал атышулы блогер Қайсар Қамза көрерменді арбаудың небір айласын жасап келген. Ол Telegram-арнасында онлайн-казиноға қосылу жолдарын егжей-тегжейлі түсіндіріп, жалған видеолар арқылы миллиондап ұтып алған «жеңімпаздарды» көрсеткен. Агенттік мұны «қоғамға ашық арандату» деп бағалады.
«Қамза казино жарнамасынан түскен қаражатты қымбат қонақүйлерде сейіл құрып, Оңтүстік-Шығыс Азия, Түркия, БАӘ-ге саяхаттауға жұмсап жүр. Бұл – халықтың сенімі мен адал еңбегінен жиналған ақша», – дейді агенттік.
Тексеру тізімінде тағы бір аты аталған – трансгендер Наиль Тұрғанов. Оның заңсыз жарнамадан тапқан табысы 8 млн теңгеден асқан.
Сондай-ақ, 600 мыңнан астам оқырманы бар блогер-музыкант Ринат Шамшырақ та онлайн-казиноның амбассадоры болғаны белгілі болды.
Бұған қоса, Нұрғазы Тоқтаров («Nakonay Qarapaiym») желіде заңсыз ойынға ашық шақырып, 15,8 млн теңгетапқан, алайда соның тең жартысын құмар ойында өзі ұтылып қалған.
Құмарлық бизнесінен тек ерлер ғана емес, әйел блогерлер де пайда көрген. Мәселен, Instagram-дағы стористеріне жарнама салғаны үшін Мариям Құлжабаева («@oomariko») 350 мың теңге сыйақы алған. Бұдан бөлек, Диана Халметова, Әсем Әубәкірова, Зухра Хәкиева, Арина Байкова және Күмісай Әйімбетова сияқты блогерлердің де аты аталды.