Қазақстанның сегіз қаласы мен аймағындағы зейнеткерлерге 1 қазанда атап өтілетін Қарттар күніне орай төлемақы беріледі,-деп хабарлайды newsroom.kz
Әлеуметтік төлемдер Астана қаласы, Ақмола облысы, Қарағанды қаласы, Қарағанды облысы, Ұлытау облысы, Павлодар облысы, Ақтау қалася мен Атырау облысында тұратын қарттарға беріледі.
Деректерге сүйенсек, Астана қаласындағы зейнеткерлерге бір реттік төлем ретінде 2,5 АЕК (9 230 теңге) беріледі. Ақмола облысындағы зейнеткерлерге 2-ден 5 АЕК-ке дейін (7 384 теңгеден 18 460 теңгеге дейін) төленеді. Қарағанды қаласында 75 жастан асқан азаматтарға 20 000 теңге көлемінде төлем беріледі. Ал Қарағанды облысында 70 жастан асқан қарттарға жергілікті өкілді органдардың шешімімен бір реттік материалдық көмек көрсетіледі.
Ұлытау облысында 11 483 қарт адамға 20 000 теңгеден төленеді. Павлодар облысында минималды және минималды көлемнен төмен зейнетақы алатын зейнеткерлерге – 2 АЕК (7 384 теңге), 80 жастан асқан және минималды немесе одан төмен зейнетақы алатын зейнеткерлерге – 3 АЕК (11 076 теңге) берілмек.
Сондай-ақ мәліметтерге сүйенсек, Ақтауда 70 жастан асқан зейнеткерлерге 2 АЕК (7 384 теңге) көлемінде төлем беріледі. Атырау облысында әлеуметтік көмек тек мүгедектігі бар қарт адамдарға көрсетіледі. Оларға қазан айында 7,5 АЕК (27 690 теңге) төленеді.
Түркістан, Қызылорда, Жетісу, Абай, Шығыс Қазақстан, Жамбыл, Ақтөбе, Солтүстік Қазақстан облыстарының, Алматы, Қостанай және Орал қалаларының әкімдіктері зейнеткерлерге төлемдер қарастырылмағанын хабарлады. Алматы, Маңғыстау облыстары мен Шымкент қаласында Қарттар күніне төлемдер туралы ақпарат әлі берілмеген.