Ауыл шаруашылығы министрлігінің мәліметінше, жоспар аясында шопандар мен малшылар үшін зейнет жасын төмендету, әскери қызметтен кейінге қалдыру, сондай-ақ олардың балаларына білім беру гранттарын басым тәртіппен беру көзделген.
Сонымен қатар ауыл кәсіпкерлерін қолдауға бағытталған бірқатар қаржылық шаралар қарастырылған. Атап айтқанда, асыл тұқымды мал сатып алуға жылдық 6 пайызбен ұзақ мерзімді жеңілдетілген несие беру, ал айналым қаражатын толықтыру үшін 5 пайыздық несие тетігін енгізу жоспарланған.
«Бұл қаражат жем-шөп, жанар-жағармай, ветеринариялық дәрі-дәрмек және басқа да өндірістік шығындарға жұмсалуы мүмкін», — деді ауыл шаруашылығы вице-министрі Аманғали Бердалин.
Сондай-ақ көшпелі және отарлы мал шаруашылығын дамытуға арналған бірыңғай 6 пайыздық несие өнімі іске қосылады. Барлық бағдарламалар мемлекет кепілдігімен «Даму» қоры арқылы ұсынылады.
Қоғамдық кеңес отырысында мал шаруашылығына өсімдік шаруашылығы өкілдерін тарту, қазақтың ақбас және әулиекөл тұқымдарын қолдау, малшыларға тұрғын үй салуды субсидиялау секілді ұсыныстар да айтылды.
QazaqSut республикалық палатасының директоры Азамат Сағынбаевтың айтуынша, жоба фермерлердің ұсыныстары ескеріле отырып әзірленген. Кеңес мүшелері құжатты бірауыздан қолдады.
