Құттықтау жеделхатында Дональд Трамп соңғы бір жылда Қазақстан мен АҚШ арасындағы ынтымақтастықтың тереңдей түскенін жазған. Оның айтуынша, екі ел халықаралық бейбітшілік пен қауіпсіздік мәселелерінен бастап, өзара тиімді коммерциялық келісімдерге дейінгі бағыттарда бірлесіп жұмыс істеп келеді.
«Өткен бір жылда серіктестігімізді тереңдете түскенімізді мақтан тұтамын. Бұл халықаралық бейбітшілік пен қауіпсіздік саласындағы ынтымақтастықтан бастап, екі елге де пайда әкелетін маңызды коммерциялық келісімдерге дейінгі бағыттарды қамтиды», – делінген жеделхатта.
АҚШ президенті 1991 жылы Америка Құрама Штаттары Қазақстанды егемен мемлекет ретінде алғашқылардың бірі болып емес, бірінші болып халықаралық деңгейде мойындағанын атап өткен. Сондай-ақ Қазақстанның тәуелсіздігін, егемендігі мен аумақтық тұтастығын қолдау ұстанымы өзгермейтінін мәлімдеген.
Трамп америкалық компаниялардың Қазақстанның экономикалық жетістіктеріне елеулі үлес қосқанын және алдағы уақытта да маңызды рөл атқара беретінін айтқан. Ол екі ел арасындағы достықтың алдағы онжылдықтарда да нақты нәтижелерге жеткізетініне сенім білдірді.
«Желтоқсанда өтетін G20 саммитінде сізбен кездесуді асыға күтемін», – деп жазған Дональд Трамп.
