Қасым-Жомарт Тоқаев алғашқы Каспий экологиялық саммитінде сөйлеп, 2000 жылдан 2025 жылға дейін Каспий теңізінің жалпы аумағы 16 мың шаршы шақырымнан астам қысқарғанын айтты.
Президенттің сөзінше, кейбір жағалау учаскелерінде су шебі ондаған шақырымға кейін шегінген. Ол теңізге келетін судың азаюы, климаттың жылынуы және адам әрекетінің салдарынан Каспийдің нәзік табиғи жүйесіне айтарлықтай зиян келіп жатқанын жеткізді.
Тоқаев каспий итбалықтарының жағдайына да ерекше назар аударды. Оның айтуынша, соңғы ғасырда олардың саны 1 миллионнан 270 мыңға дейін төмендеген.
– Каспий – бірегей табиғи қазына, миллиондаған адамның әл-ауқатының көзі, Еуразия құрлығының маңызды көлік және энергетикалық торабы. Сондықтан оның экожүйесін сақтау ең алдымен біздің мемлекеттерден ерекше назарды талап етеді, – деді Президент.
Мемлекет басшысы Қазақстанның экологиялық мәселелерді ел ішінде де, халықаралық деңгейде де шешуге күш салып келе жатқанын атап өтті. Оның айтуынша, жаңа Конституцияда табиғатты аялау құндылықтары көрініс тапқан, ал «Таза Қазақстан» жалпыұлттық қозғалысына шамамен 1 миллион волонтер қосылған.
Тоқаев экономикалық даму мен табиғатты қорғау бір-біріне қарсы емес, керісінше, бірін-бірі толықтырады деген ұстаным ұстанатынын айтты.
