Президент Қасым-Жомарт Тоқаев Республика күніне арналған салтанатты жиында Жаңа Конституцияның ел дамуына ықпалын және мемлекеттік басқару жүйесіндегі өзгерістерді атап өтті. Ол Негізгі заң мемлекет үшін басты құндылықтарды бекітіп, стратегиялық бағыттарды айқындағанын айтты.
Мемлекет басшысының сөзінше, келісім мен тұрақтылық Қазақстанға күрделі сын-қатерлерден өтуге мүмкіндік берген. Оның айтуынша, бүкілхалықтық ерік білдіру арқылы қабылданған Жаңа Конституция елдің одан әрі даму жолына бағдар болған.
«Әрбір қағида, Негізгі заңның әрбір бабы ел мүддесіне қызмет етуге тиіс. Елдің егемендігі, аумақтық тұтастығы, азаматтардың заңды құқықтары мен бостандықтары Конституциямызда ең жоғары құндылықтар деп танылды. Заң мен тәртіпті қамтамасыз ету, жалпыұлттық бірлікті нығайту мызғымас қағидат ретінде бекітілді. Ғылым мен білімді, инновация мен жоғары технологияны дамыту мемлекет қызметінің стратегиялық бағыты ретінде айқындалды», – деді Тоқаев.
Сонымен қатар президент мемлекеттік билік құрылымындағы өзгерістерге тоқталды. Оның айтуынша, бір палаталы Құрылтай қалыптастырылды, Вице-президент лауазымы енгізілді, Қауіпсіздік Кеңесінің құрылымына өзгерістер жасалды. Бұдан бөлек, жоғары кеңесші орган – Қазақстан Халық Кеңесі өз жұмысын бастады.
Тоқаев Қазақстан әлемде осындай ауқымды өзгерістерді күрделі әрі тұрақсыз жағдайда жүзеге асырған аз елдердің бірі екенін де айтты. Оның сөзінше, мұндай қадамдар ел үшін үлкен саяси алға басу болды.
