Кәсіподақ төрағасы Бақытжан Тәжибаев Құрылтай депутаты Дана Медеуованың дәрігерлер мен медицина қызметкерлерінің кәсіби мәртебесіне қатысты бастамасына пікір білдірді.
Оның айтуынша, қолданыстағы «Халық денсаулығы және денсаулық сақтау жүйесі туралы» кодекс пен медицина қызметкерлерінің кәсіби жауапкершілігін сақтандыру жүйесі күтілген нәтижені толық қамтамасыз етпейді.
Мәселен, медицина қызметкерлерінің кәсіби жауапкершілігін сақтандыруға жыл сайын шамамен 6 млрд теңге бағытталады. Ал медициналық көмек көрсету кезінде зиян келтірілген пациенттерге жасалған төлем көлемі 600 млн теңгеден сәл ғана асқан.
Кәсіподақ өкілдері медициналық және фармацевтикалық бақылау органдары материалдарды құқық қорғау органдарына берген жағдайларда да қылмыстық істер саны артқанын атап өтті.
Aqniet басшысының пікірінше, мемлекет дәрігердің қасақана жасаған әрекеті мен кәсіби қателігін немесе медициналық тәуекелді нақты ажыратуы қажет.
Осыған байланысты кәсіподақ Қылмыстық кодекстің 317-бабын, егер дәрігердің әрекетінде қасақаналық болмаған жағдайда, декриминализациялауды ұсынады.
Кәсіподақтың ұстанымынша, дәрігердің кәсіби қатесі мен қасақана жасалған қылмысқа бірдей құқықтық баға берілмеуі керек.
