Даулет Бекманов Қазақстан Республикасының қорғаныс министрінің орынбасары болып тағайындалды. Тиісті өкімге мемлекет басшысы қол қойды.
Ақорда таратқан мәліметте: «Бекманов Даулет Нысанхулович Қазақстан Республикасының қорғаныс министрінің орынбасары болып тағайындалды» делінген.
Даулет Бекманов 1983 жылы туған. Ол «Мирас» университеті мен әл-Фараби атындағы Оңтүстік Қазақстан мемлекеттік университетін тәмамдаған.
Еңбек жолын жеке ұйымдардың бірінде жүйелік инженер болып бастаған. Әр жылдары «НИТ» АҚ-да, байланыс және ақпарат, көлік және коммуникациялар, инвестициялар және даму министрліктерінде қызмет атқарды.
2018-2020 жылдары «Ұлттық ақпараттық технологиялар» АҚ басқарма төрағасының орынбасары болды. 2020 жылдың ақпанында Цифрлық даму, инновациялар және аэроғарыш өнеркәсібі министрлігінің мемлекеттік көрсетілетін қызметтер комитетін басқарды.
2023 жылдың мамырында «Қазпошта» АҚ-ға ауысып, мемлекеттік қызметтер көрсету жөніндегі басқарушы директор қызметін атқарды. 2025 жылдың шілдесінде «Ұлттық ақпараттық технологиялар» АҚ-ның басшысы болып тағайындалған еді.
