Александр Пактың таныстарына қатысты жалған айғақ беру фактісі бойынша іс қайта қозғалды. Бұл адамдар өлімге әкелген жол апатына дейін онымен бірге мейрамханада болған.
Алматы прокуратурасы қазір бұл іс бойынша сотқа дейінгі тергеу жүріп жатқанын растады. Ведомство ҚР Қылмыстық кодексінің 420-бабы 1-бөлігі бойынша іс қаралып жатқанын хабарлады.
Прокуратура күдіктілер саны мен істі сотқа беру мерзімін нақтыламады. Бұған тергеу құпиясы себеп болғаны айтылды.
28 мамырда сот кулуарында марқұм қыздардың бірінің отбасы атынан қатысқан заңгер Мейірман Шекеев тергеу Александр Пакпен бірге болған адамдарға қатысты материалдарды бөлек өндіріске шығарғанын айтқан еді.
Оның сөзінше, бастапқыда олар Пактың алкоголь ішпегенін айтқан. Алайда кейін медициналық сараптама нәтижелері мен басқа да дәлелдер, соның ішінде төленген шот, табылған соң, бұл эпизод жеке іс ретінде тіркелген.
5 маусымда бұл қылмыстық іс тоқтатылғаны хабарланған. Ішкі істер министрлігі полиция қылмыстық құқық бұзушылық құрамын таппағанын айтқан еді. Кейін прокуратура бұл шешімнің заңдылығын тексеруі тиіс болған.
