Алматыда коммуналдық қызметтердің тиімділігін арттыру үшін цифрлық технологияларды енгізу жұмыстары жалғасуда. Қазіргі таңда инженерлік желілерді басқаруды автоматтандыруға ерекше назар аударылып отыр. Бұл коммуналдық жүйелердің тұрақтылығын қамтамасыз етуге және апаттық жағдайлардың алдын алуға мүмкіндік береді.
Жобалар аясында SCADA жүйелері, IoT құрылғылары және цифрлық бақылау технологиялары кезең-кезеңімен енгізілуде. Заманауи датчиктер арқылы су, жылу және электр желілерінің жағдайы онлайн режимде бақыланып, ақауларды жедел анықтау мүмкіндігі пайда болады. Мамандардың айтуынша, бұл ресурстарды тиімді пайдалануға және шығындарды азайтуға ықпал етеді.
Сонымен қатар қалада «Digital Twin» немесе «Цифрлық егіз» жобасы жүзеге асырылып жатыр. Жоба аясында Алматының инженерлік инфрақұрылымы толықтай цифрлық форматта модельденеді. Бұл қаладағы коммуналдық жүйелердің жұмысын бір орталықтан басқаруға мүмкіндік береді.
Цифрлық технологияларды енгізу арқылы коммуналдық қызметтердің ашықтығын арттыру да көзделіп отыр. Тұрғындар коммуналдық жүйелердің жағдайы туралы ақпаратты онлайн ала алады. Сонымен бірге төлем жүйелерін автоматтандыру және ресурстарды есепке алу жұмыстары жеңілдейді.
Сарапшылардың пікірінше, «ақылды ЖКХ» жүйесін дамыту Алматының заманауи мегаполис ретінде қалыптасуына ықпал етеді. Цифрлық шешімдерді енгізу инженерлік инфрақұрылымның тиімділігін арттырып, тұрғындардың өмір сапасын жақсартуға мүмкіндік береді.
