Ұлттық статистика бюросының мәліметінше, 2025 жылдың қаңтар–желтоқсан айларының қорытындысы бойынша халықтың нақты табыс индексі өткен жылмен салыстырғанда 98,9%-ды құрады. Бір адамға шаққандағы орташа табыс 238 070 теңгеге жетіп, номиналды түрде 10,2%-ға артқан.
Министрліктің атап өтуінше, нақты табыстың төмендеуі экономикалық өсімнің халықтың әл-ауқатына толық әсер етпей отырғанын көрсетеді.
«Жалақы өсімі бизнес табысына қарағанда баяу жүріп жатыр, бұл ЖІӨ өсімі мен халық табысы арасындағы алшақтықты қалыптастырады», – деп түсіндірді ведомство.
Бағалаулар бойынша, көптеген компаниялар жалақыны 10%-дан артық көтермейді немесе бұрынғы деңгейде қалдырады. Бұл жағдай нақты табыстың өсуін шектеп отыр.
Министрлік сондай-ақ құрылымдық мәселеге назар аударды: Қазақстанда ЖІӨ-дегі еңбекақы үлесі шамамен 31%-ды құрайды, ал дамыған елдерде бұл көрсеткіш 40%-дан асады.
Халық табысы тек жалақыдан ғана емес, әлеуметтік төлемдерден де құралады. 2025 жылдың IV тоқсанының қорытындысы бойынша табыстың құрылымында жалдамалы емес жұмыстан түсетін кіріс – 8,3%, зейнетақы – 17,9%, жәрдемақылар – 3,3% болды.
Министрлік халық табысын арттыруға бағытталған шаралар үкіметтің жаңартылған бағдарламасында қарастырылғанын атап өтті. Бұған дейін хабарланғандай, 2025 жылы Қазақстан экономикасы 6,5%-ға өсіп, ЖІӨ көлемі 300 миллиард доллардан асты.
