Бұл жоба екі елдің бірлескен бастамасы болып табылады және жолбарысты Қазақстанның экожүйесіне қайта енгізуге бағытталған ұзақмерзімді бағдарламаның бір бөлігі саналады.
Ресей Қазақстанға Қызыл кітапқа енген төрт амур жолбарысын бермек. Бұл – республикада осы сирек кездесетін жыртқыштың популяциясын қайта қалпына келтіруге арналған жоба.
«Амур жолбарысы» орталығының бас директоры Сергей Арамилевтің айтуынша, жолбарыстарды беру туралы шешім жоғары деңгейде қабылданған, қазір жануарларды іріктеуге қатысты практикалық дайындық жұмыстары жүргізіліп жатыр.
Оның сөзінше, жануарларды іріктеу кезінде бірнеше маңызды талап ескеріледі. Біріншіден, олар әртүрлі жынысты болуы тиіс. Екіншіден, олардың физикалық жағдайы жақсы болуы керек — ешқандай жарақаты немесе оның салдары болмауы қажет. Сонымен қатар жолбарыстар тұяқты жануарларды аулай алуы және адамға қалыпты реакция көрсетуі тиіс.
Қажетті талаптарға сай жолбарыстар іріктелгеннен кейін олар Қазақстанға жеткізіліп, арнайы реабилитациялық орталыққа орналастырылады.
Қазақстанға келген соң жыртқыштар алдымен сол орталықта ұсталады. Мұнда мамандар олардың жаңа ортаға қалай бейімделетінін бақылап, Қазақстан аумағында кездесетін жануарларды аулау қабілетін тексереді.
Сонымен қатар жолбарыстардың адамға реакциясын анықтайтын арнайы сынақтар жүргізіледі. Осы тексерістерден кейін ғана оларды табиғи ортаға жіберу мәселесі шешіледі.
