Алдымен чемпион өзіне қолдау білдіріп жатқан барша жанкүйерлер мен әріптестеріне алғысын жеткізді. Оның айтуынша, қиын сәтте отандастарының жанынан табылып, сенім білдіруі – үлкен рухани күш.
«Маған қолдау көрсетіп жатқан барша спортшы бауырларыма және жанкүйерлерге шын жүректен алғыс айтамын. Кейбір шетелдік жанкүйерлер бұл жағдайға қуанып жатқанда, өз қазағым тазалығыма сеніп, қолдау көрсетті. Бұл – мен үшін ең үлкен жеңіс. Демек, бокс жолында жаман жанкүйер жинамаған екенмін», – деп жазды ол.
Сондай-ақ Жәнібек Әлімханұлы әрдайым таза спорт қағидаларын ұстанып келгенін тағы бір мәрте атап өтті.
«Мен әрқашан таза спортты қолдаймын және оны насихаттап келемін. Мұны баршаңыз жақсы білесіздер», – деді чемпион.
Айта кетейік, желтоқсан айына жоспарланған Жәнібек Әлімханұлы мен WBA нұсқасы бойынша әлем чемпионы Эрисланди Лара арасындағы жекпе-жек допинг сынамасына байланысты туындаған даудың салдарынан өтпейтін болды. Бұл кездесу орта салмақтағы жылдың басты айқастарының бірі ретінде бағаланған еді.
Жәнібек Әлімханұлы 1993 жылғы 1 сәуірде дүниеге келген. Ол әуесқой бокста 2013 жылы әлем чемпионы атанып, Азия чемпионатында да топ жарған. Кәсіпқой бокстағы қазіргі рекорды – 17 жеңіс, оның 12-сі нокаутпен аяқталған.
