«Диапазон» басылымының мәліметінше, оқиға 19 қаңтар күні сағат 17:45 шамасында көпқабатты тұрғын үйлердің жанында орналасқан бір қабатты шағын ғимаратта болған. Оқиға орнынан түсірілген бейнежазбалар әлеуметтік желілерде тарады.
Бейнебақылау камерасындағы кадрларға қарағанда, жарылыстың күші қатты болғаны сонша, ғимараттың шатыры ұшып кетіп, артынан өрт шыққан.
Ақтөбе облыстық Төтенше жағдайлар департаментінің хабарлауынша, жарылыс ыстық сумен қамтамасыз етуге арналған газ жабдығының іске қосылуы кезінде орын алған. Кейін көлемі 12 литрлік газ баллонынан газ бен жалынның кенеттен шығуы ғимараттың опырылуына әкелген.
Оқиға орнына жедел түрде екі өрт сөндіру автокөлігі мен жеті өрт сөндіруші жұмылдырылды.
Төтенше жағдай салдарынан 30 бен 60 жас аралығындағы бес адам күйік жарақатымен аудандық ауруханаға жеткізілді.
Облыстық денсаулық сақтау басқармасының мәліметінше, бір науқас денесінің 20 пайызы күйіп, жансақтау бөлімінде жатыр, ал қалған төртеуі травматология бөлімінде ем қабылдауда.
Қазіргі таңда оқиғаның себептері мен мән-жайы анықталып жатыр.
