Құжатқа сәйкес, 2025 жылғы 1 қарашадан 2026 жылғы 1 шілдеге дейін ипотека бойынша ең жоғарғы мөлшерлеме бұрын жоспарланған 20% емес, 25% деңгейінде белгіленеді. Қаулы 2025 жылғы 26 желтоқсанда Әділет министрлігінде тіркелген.
Реттеуші органдар бұл шешімді Ұлттық банктің базалық мөлшерлемесінің жоғары болуымен (18%) және ипотекалық бағдарламалардың толық тоқтап қалу қаупімен түсіндірді. Олардың айтуынша, мөлшерлемені қатаң шектеу банктердің ипотекалық несие беруін азайтып, әлеуметтік тәуекелдерді күшейтуі мүмкін.
Агенттік өкілдері мөлшерлеменің шегін уақытша көтеру банктерге бұрын мақұлданған өтінімдерді аяқтауға және нарықта ипотека ұсынысының күрт қысқаруына жол бермеуге мүмкіндік беретінін атап өтті. Осылайша, тұрғындар үшін несие қолжетімділігі мен банк секторының тұрақтылығы арасындағы тепе-теңдік сақталады.
