Президент Үкіметке қала әкімдігімен бірлесе отырып, бұл мәселені терең пысықтап, нақты ұсыныстар әзірлеуді жүктеді.
Оның айтуынша, жуырда Қазақстанда толыққанды авиахабтар қалыптастыру мәселесі талқыланған. Бұл бағытта Астана әуежайына қатысты да белгілі бір жұмыстар қарастырылып отыр. Алайда авиациялық жанармай өндірісінің жеткіліксіздігі авиахабтарды дамытуға елеулі кедергі келтіруі мүмкін.
Осыған байланысты Үкімет авиаотын өндірісін ұлғайту үшін нақты әрі пәрменді шаралар қабылдауы тиіс. Мемлекет басшысы бұл мақсатта жаңа мұнай өңдеу зауытын салу мүмкіндігін де жоққа шығармайтынын айтып, оның оң және теріс тұстарын жан-жақты саралау қажеттігін атап өтті.
Президент Үкімет бұл мәселеге қатысты өз ұстанымын айқындап, нақты шешім қабылдауы керек екенін қадап айтты.
