Жеті айға созылған сот процесінің қорытындысында айыпталушының кінәсі толық дәлелденді.
38 жастағы, үш баланың әкесі саналатын шетелдік азамат өткен жылы Қазақстанға жұмыс іздеп келген. Ол Түркістан облысындағы Төрткүл ауылында наубайханада еңбек етіп, күнкөрісін тапқан.
Сотта белгілі болғандай, айыпталушы азық-түлік дүкенінде 2009 жылы туған кәмелетке толмаған жәбірленушіні бұрыннан таныған. Сол күні де әдеттегідей нан жеткізіп, ақшасын алғаннан кейін түнгі сағат бірлер шамасында айналада ешкім жоқ сәтті пайдаланып, күш қолдана отырып зорлау және жыныстық сипаттағы зорлық әрекеттерін жасаған. Кейін қылмысын жасыру мақсатында жәбірленушіні қасақана өлтірген.
Бұл туралы Түркістан облысының қылмыстық істер жөніндегі мамандандырылған ауданаралық сотының төрағасы Дәурен Мадалиев мәлімдеді.
Жабық режимде өткен соттың соңғы отырысына марқұм қыздың ата-анасы қатыспаған. Ал сотталған азамат пен оның әкесі үкіммен келіспейтіндерін айтып, істі апелляциялық тәртіппен қайта қарауға ниетті екенін білдірді.
