Алғашқы шағымдар әлеуметтік желілерде пайда болды. Instagram желісіндегі Oreo-ның ресми парақшасының астында қазақстандықтар наразылық білдіріп, кодты телефонмен тексеріп көргенін жазды. Нәтижесінде бренд сайтының орнына құмар ойындар ресурсы ашылған. Бұл «сюрприз» печеньенің шағын қаптамаларында да, үлкен пачкалар мен қораптарда да қайталанған.
Kursiv.kz дерегінше, қазір сілтеме арқылы онлайн-казино ашылмайды, алайда бет әлі де Oreo брендіне қатысы жоқ болып шықты. Оның орнына күмәнді ұсыныстар шығады: «тегін iPhone 13», «экземадан үй жағдайындағы ем», автокөлікті VIN-нөмірі арқылы тексеру, сондай-ақ «бизнеске арналған ЖИ қызметтері».
Жағдайға Oreo Kazakhstan пікір білдірді. Компания бұл техникалық ақау екенін және QR-кодтың бұзылғанын мәлімдеді.
«Қазіргі таңда Oreo қаптамаларында үшінші тарап ресурстарына апаратын қате әрі бұзылған QR-код тіркелді. Бұл сілтемелер Oreo-ға қатысы жоқ, бренд мұндай сілтемелер арқылы жеке деректерді сұрамайды. Мәселені шешу үстіндеміз және уақытша қаптамадағы QR-кодтарға өтпеуді сұраймыз», — деп хабарлады компания өкілдері.
