Актриса бұл жағдайдың өз еркінен тыс болғанын атап өтті. Оның сөзінше, күзет – барған мейрамхананың ішкі тәртібі аясында ұсынылған.
«“Күзет сенің не теңің?” деп жерден алып, жерге салдыңыздар. Сол видео таралып кеткені сонша, үтікті қоссақ та алдымыздан шығады. Бұл – ресторан бекітіп берген күзет, біздің еш қатысымыз жоқ. Ақталды демеңіздер. Бір жағынан, басқа ұлттың баласындай күзетпен жүргенге не жетсін. Бірақ соған жетейік деп жақсы сөз айтқан бір қазақ табылмады», – дейді ол.
Сондай-ақ актриса жұртшылықты бір-бірін төмен тартпауға шақырды.
«Құрметті көрермен, бастаған ісіміз алға бассын десек, “сендер сондайсыңдар, сендер бұндайсыңдар” деп етектен тартпайық. Біз көпұлтты мемлекетпіз, қазақтың өзі аз. Өзгенің алдында бір-бірімізді табалап, жағадан алмайық. Енді ғана еңсемізді көтеріп келе жатқанда, сағымызды суға кетірмейік. Қай салада болсын біреу өссе, оны төмен тартуға құмар болмауымыз керек. Біз – рухы биік, текті ұрпақтың ұл-қызымыз», – деп жазды актриса.
