Кеше өткен «Жеңімпаздарды марапаттау рәсімі» форумында ел Президентінің сөздері қатысушыларға ерекше әсер қалдырды. Мемлекет басшысының әрбір тезисінен кәсіпкерлерге деген терең эмпатия, олардың елдегі экономикалық және әлеуметтік процестерге қосқан үлесін шын мәнінде бағалау сезіліп тұрды. Президент бизнес — мемлекеттің стратегиялық серіктесі екенін атап өтіп, Үкімет пен «Атамекен» ҰКП-ға бизнесті қорғау және қолдау бойынша нақты тапсырмалар берді.
Форумның ең маңызды сәттерінің бірі — Мемлекет басшысының ірі кәсіпорындарға ел дамуына қосқан зор үлесі үшін арнайы марапат табыстауы. Бұл қадам бизнес қауымдастығына берілген жоғары бағаны ғана емес, Қазақстанда әлеуметтік жауапкершілік мәдениетінің жаңа деңгейге көтерілгенін көрсетті.
«Парыз» премиясы: әлеуметтік жауапкершілікті қалыптастыратын маңызды институт
Форумда «Парыз» байқауы ерекше орын алды. Бұл премия көп жылдан бері Қазақстанда әлеуметтік жауапкершілік мәдениетін жүйелі түрде қалыптастырып келеді. «Парыз» компаниялардың тек экономикалық міндеттерді орындап қоймай, өңірлердің дамуына, инфрақұрылымға, білім беру, денсаулық сақтау, спорт сияқты салаларға елеулі инвестиция салып жүргенін дәлелдейді.
ГМК және энергетика бағытының кураторы ретінде бұл премияның мен үшін маңызы ерекше. Себебі лауреаттар қатарында біздің саланың компаниялары бар, әрі олардың әлеуметтік саясаты декларация емес, күнделікті жұмыс нормасы екені тағы да дәлелденді. Бұл — шынайы кәсіби мақтаныш.
Kazakhmys: әлеуметтік үлесі үшін бірінші орын
Kazakhmys компаниясы биыл әлеуметтік жауапкершілік бойынша бірінші орынды иеленді. Бұл — адамға бағытталған корпоративтік саясаттың лайықты бағалануы. 2025 жылы компания өңірлерді дамыту мен қызметкерлерді қолдауға 90 млрд теңгеден астам қаржы бөлді. Тұрғын үй, денсаулық сақтау, инфрақұрылым, білім беру, спорт — әр бағыт нақты қамқорлықтың көрінісі.
Kazakhmys-та комплаенс-қызметтің бұрынғы басшысы ретінде айтарым: бұл компания әрдайым әлеуметтік жауапкершілігі жоғары ұйым болды. Марапат — жүйелі еңбектің нәтижесі.
Qarmet: ең үздік ұжымдық шарт
«Qarmet» компаниясының «Ең үздік ұжымдық шарт» аталымында жеңіске жетуі — шын мәнінде тарихи оқиға. Шетелдік инвестор келгеннен бері алғаш рет әкімшілік пен кәсіподақтар арасында шынайы серіктестік орнатылды. Бұл — әлеуметтік саясаттың компания ішінде нақты жұмыс істеп тұрғанын көрсетеді. Қызметкердің еңбегі мен құқығы корпоративтік мәдениеттің ортасында тұр.
ПАЗ: еңбек қауіпсіздігін дамытудағы үздік тәжірибе
АО «Алюминий Казахстана»-ның Павлодар алюминий зауыты еңбек қауіпсіздігі бойынша күміс награда алды. Зауытта құрылған Қауіпсіз еңбек дағдылары орталығы қызметкерлердің практикалық машықтарын арттырып, қауіпсіздік мәдениетін жаңа деңгейге көтерді. ERG компаниясы жалпы әлеуметтік жауапкершілік, экология және еңбек қауіпсіздігі бағытында елдегі ең жоғары стандарттарды көрсетіп келеді. Биылғы марапаттар — олардың жұмысының бір бөлігі ғана.
Өңірлер дамуына қосқан үлес
ТОО «Өскемен ЖЭО» экологияға қосқан үлесі үшін марапатталды. Бұл — компанияның өңірдің болашағына инвестиция салып отырғанының айғағы.
«Силумин-Восток» өндірістік мақсаттағы үздік кәсіпорын ретінде «Алтын сапа» арнайы премиясына ие болды.
