«Үйді тартып алған жоқпын» – Айнұр Сабыр дауға қатысты пікір білдірді
Айнұр Сабыр әлеуметтік желідегі мәлімдемесінде әкімдік тарапынан айтылып жатқан айыптарды шындыққа жанаспайды деп атап өтті.
«Үйді әкімнен тартып алған жоқпын. Басып кіру деген мүлдем болған емес. Менің жағдайымды төтенше жағдай комиссиясы бір жыл бұрын-ақ зардап шеккен деп таныған. Сол негізде құжат рәсімделіп, шешім қабылданған», — дейді ол.
Оның айтуынша, үйді рәсімдеу процедурасы толық заңды түрде өтіп, 2024 жылдың қазанында келісімшарт та берілген. Үй толықтай оның атына өткен.
Сондай-ақ Айнұрдың ескі баспанасы ресми түрде жарамсыз деп танылып, оған қатысты барлық акт, фотодәлелдер, ордер және басқа құжаттар қолында бар.
«Әкімнің бұл іске қатысты өз жоспары болғандай»
Белсендінің сөзінше, даудың күшеюіне әкімдік ішіндегі түсініксіз шешімдер себеп болған.
Ол қала әкімі Нариман Төреғалиұлына бірнеше сұрақ қойды:
«Отыз адамның ішінен мені ғана бөліп алып, сотқа бергеніңіз қалай? Егер шешім дұрыс болмаса, барлығына бірдей қарау керек емес пе?» — деп жазады Айнұр.
Ол бұл даудың мәні тек бір үйдің төңірегінде емес екенін айтады. Бұл — зардап шеккендерге көрсетілетін көмектің әділеттілігі мен мемлекеттік органдардың жауапкершілігіне қатысты мәселе.
Даудың құқықтық жағы: не белгілі?
Айнұр Сабыр берген жауабында:
1. Айып тағылған жоқ.
Облыс әкімі «үй беру туралы қаулыны жою» туралы талаппен қала әкімін сотқа берген. Сол тізімде Айнұр да бар.
2. Құжат толық.
Оның қолында:
• жаңа үйдің ордері,
• ескі үйдің жарамсыз екені туралы акт,
• фотодәлелдер бар.
3. Әрі қарайғы қадамдар.
«Сот жүріп жатыр. Процесс аяқталмай, нақты жоспар айту қиын», — дейді ол.
БҚО-дағы бұл жағдай — бір адамның жеке мәселесінен гөрі, төтенше жағдайдан кейінгі жүйелі проблемаларды көрсететін күрделі оқиға.
Айнұр Сабырдың айтуынша, өзін «алаяқ» етіп көрсету — әділетсіз, себебі оның барлық әрекеті заң аясында жасалған.
Даудың қалай шешілетіні — соттың қорытындысына байланысты. Бірақ бұл оқиға су тасқынынан зардап шеккендердің жағдайына қатысты қоғамдағы пікірталасты қайта күшейтті.