Мемлекет инклюзивті қоғам қалыптастыруда құқықтық, инфрақұрылымдық және экономикалық бағыттар бойынша жүйелі саясат жүргізуде. Бүгінгі таңда ерекше қажеттіліктері бар азаматтардың құқықтарын қорғау туралы заңнамалық база жетілдіріліп, әлеуметтік қызметтер порталы жұмыс істейді.
«Инклюзия тек бір министрліктің міндеті емес. Бұл – барлық саланың ортақ жауапкершілігі. Әрбір мекеме, ұйым өз кеңістігін барша азамат үшін қолжетімді етуге тиіс. Бұл – әлеуметтік әділеттің ең қарапайым, бірақ ең маңызды көрінісі», – дейді мемлекеттік қызмет саласының ардагері Жайдарбек Зинуллин.
Сондай-ақ, коммуналдық сала ардагері Жұмабек Шәменов:
«Қалалық орта адамдарға жайлы әрі қауіпсіз болуы керек. Пандустар мен дыбыстық бағдаршамдар – жай ғана инфрақұрылым элементі емес, адамның қадіріне деген құрмет. Егер біз қаланы барлық адамға бейімдесек, онда қоғамымыз шын мәнінде дамыған деп айта аламыз», – дейді.
Қазіргі таңда жергілікті әкімдіктер мен бизнес құрылымдары әлеуметтік жауапкершілік жобаларын іске асырып, ерекше жандарға арналған жұмыс орындарын көбейтуде. Мемлекет тарапынан әлеуметтік кәсіпкерлікке жағдай жасалып, гранттар мен салықтық жеңілдіктер енгізілді.
Қоғамның әлеуметтік-демографиялық дамуы мен инклюзивті бағыттағы саясаты – Қазақстанның адамға бағытталған мемлекет ретіндегі бейнесін айқындайды. Ерекше қажеттіліктері бар азаматтарды қолдау – тек әлеуметтік міндет емес, рухани биіктік пен өркениеттіліктің өлшемі.
Сарапшылардың пікірінше, елімізде қалыптасып келе жатқан жаңа қоғамдық сана – адамды орталыққа қоятын әділетті қоғамның негізі. Инклюзия — тек бір топтың мәселесі емес, бүкіл елдің мәдени жаңғыруының символы.
Мақсат – ешкім шет қалмайтын, әрбір азамат өз әлеуетін жүзеге асыра алатын, мейірімді және тең қоғам құру. Осындай қоғам ғана шынайы дамыған, рухы биік, болашағы нық мемлекет болмақ.