«Kazakhstan Petrochemical Industries Inc.» (KPI) зауытындағы жанып тұрған алаудың видеосы тарағаннан кейін Атырау облысының экологтары жоспардан тыс тексеріс жүргізді. Тексеру нәтижесінде кәсіпорын атмосфераға зиянды заттардың рұқсат етілген мөлшерінен асып кеткені үшін 1 миллион теңге айыппұл төлеуге міндеттелді.
Оқиға тамыз айында іске қосу-жөндеу жұмыстары кезінде болған. Компания өкілдерінің айтуынша, газды алау арқылы шығару — қорғаныс жүйесі іске қосылғаннан кейін қабылданған уақытша қауіпсіздік шарасы болған. Зардап шеккендер жоқ.
Экологтар рұқсат етілген нормадан 0,0075 тоннаға артық шығарындылар тіркеген, ал газдың жану уақыты 207 минутқа созылған. Сонымен қатар KPI уәкілетті органдарды оқиға туралы дер кезінде хабардар етпеген.
Кәсіпорынға мұндай жағдайлар туралы екі сағаттың ішінде хабарлау, рұқсатсыз газ жақпау және шығарындылардың артуына жол бермеу жөнінде нұсқама берілді. Департаменттің мәліметінше, қазір компания анықталған бұзушылықтарды жою жоспарын жүзеге асырып жатыр.