– Бұл сапар Қазақстан мен Қырғызстан арасындағы достық қарым-қатынасқа тың серпін беретініне сенімдімін. Қазақ пен қырғыз – тамыры бір, тарихы, дәстүрі мен дүниетанымы жақын халықтар. Екі ел ежелден Алатаудың баурайында тату-тәтті өмір сүріп келеді. Қазір біздің байланысымыз стратегиялық әріптестік рухында қарқынды дамып жатыр. Барлық деңгейде саяси диалог орнықты. Мемлекетаралық, парламентаралық және үкіметаралық кеңестер жұмыс істеп тұр, өңіраралық қарым-қатынас жолға қойылған. Жалпы алғанда, Қазақстан мен Қырғызстан арасында жан-жақты әрі берік ынтымақтастық қалыптасқан, – деді Мемлекет басшысы.
Тоқаев сондай-ақ Садыр Жапаровтың екі ел қарым-қатынасын нығайтудағы жеке еңбегін ерекше атап өтті. Оның сөзінше, Қырғызстанда оң өзгерістер байқалады, ал биылғы жылдың басынан бері ел экономикасының өсімі 11,7%-ды құраған.
– Біз бауырлас Қырғызстанның жетістігіне қуаныштымыз және өзара ықпалдастықты одан әрі дамытуға ерекше мән береміз, – деді Қасым-Жомарт Тоқаев.