Ауыл шаруашылығы вице-министрі Төлеутай Рахымбековтың сөзінше, ет бағасын тұрақтандыру үшін тірі мал экспортына біржола, мерзімсіз тыйым салу қажет.
— Қазір еттің бағасы 5–5,5 мың теңге. Жаз мезгілі екенін ескеру керек, ыстықта етті сақтау қиын. Ал күзде баға бұдан да көтерілуі ықтимал, — деді ол.
Вице-министрдің айтуынша, бағаның өсуіне көршілес Өзбекстаннан сұраныстың артуы ғана емес, жемшөптің негізсіз қымбаттауы да әсер етіп отыр. Мәселен, биыл бір тонна шөп 48–50 мың теңге, ал өзіндік құны бар болғаны 10–12 мың теңге. Бұл жағдай ауыл тұрғындарын мал басын азайтып, союға мәжбүрлеуде, ал бұл болашақта бағаны одан әрі өсіреді.
— Ет қымбаттаса, барлық азық-түлік бағасы өседі. Сондықтан ет бағасының артуынан кейін көкөніс, жеміс-жидек, ал кейін жалпы азық-түлік қымбаттауын күтеміз, — деп болжады Төлеутай Рахымбеков.