Көлік министрі Нұрлан Сауранбаев биыл Қазақстанның әуе кемелер паркі 16 ұшақпен толығатынын, олардың алтауы қазірдің өзінде сатып алынғанын мәлімдеді. 2030 жылдың соңына дейін әуе кемелерінің жалпы саны 221 бірлікке жетпек.
2025 жылдың басынан бері қазақстандық әуе компаниялар 7,2 миллион жолаушыны тасымалдаған, бұл өткен жылдың сәйкес кезеңімен салыстырғанда 6 пайызға артық. Министрдің айтуынша, әуежайларда көрсетілген қызмет көлемі 14,4 миллион адамды құрады.
2020 жылдан бастап елде 20 ұшу-қону жолағы, 19 терминал қайта жөндеуден өткізілді, Түркістан қаласында жаңа әуежай салынды.
Министрдің айтуынша, инвестициялық бағдарламалар аясында авиация саласына шамамен 2,9 миллиард АҚШ доллары тартылмақ. Бұл қаржы ірі жобаларды іске асыруға, атап айтқанда, туристік аймақтарда – Катонқарағай, Зайсан, Кендірлі мен Арқалық қаласында жаңа әуежайлар салуға, 10 ұшу-қону жолағын, 10 терминалды қайта жаңартуға және арнайы техника паркін жаңартуға бағытталады.