Министрлік бұл ұйымдардың білім беру мекемелері емес екенін ескертеді.
Министрліктің мәліметінше, шетелдік және отандық жоғары оқу орындарына түсуге көмектесеміз дейтін компаниялар көбейіп жатыр. Алайда әлеуметтік желілерде ондай орталықтардың қызмет сапасына байланысты шағымдар да жиілеген.
«Еске саламыз: мұндай ұйымдар жоғары және жоғары оқу орнынан кейінгі білім беру бағдарламаларын іске асыратын оқу орны болып саналмайды. Сол себепті олардың міндетті түрде лицензия алуы талап етілмейді. Азаматтарды келісімшартқа қол қою кезінде абай болуға, қажет жағдайда құзырлы органдардан кеңес алуға шақырамыз», – делінген министрлік хабарламасында.
Бұған дейін Астана тұрғындары шетелдік университеттерге түсуге дайындайтын орталықтың үстінен полицияға ұжымдық арыз түсірген. Олардың айтуынша, ұйым алаяқтықпен айналысқан.
