Әлеуметтік желіге бүйрегін сатуға хабарлама берген Ақтөбе қаласының 25 жастағы тұрғыны сотталды, деп хабарлайды Newsroom.kz
«Ер азамат әлеуметтік желіде шарттық баға бойынша өзінің ішкі органын сату туралы хабарландыру жариялаған. Полиция қызметкерлерімен ерікті түрде жәрдемдескен тұлға қылмыстық әрекетті имитациялау барысында сатып алушы болып, «К.»-мен мәміле жасауға келіскен.
Заңсыз мәміле жасау кезінде «К.» ұсталған. Қылмыстық іс сотталушымен кінәсін мойындау туралы процестік келісіммен сотқа түсті», - делінген хабарламада.
Сот үкімімен ер адамға шартты түрде 1 жыл 6 айға бас бостандығынан айыру жазасы тағайындалды. Оған пробациялық бақылау белгіленді. Сот актісі заңды күшіне енген жоқ.