Оқиға сәрсенбі күні Қаскелең қаласындағы Отарвановка шағынауданында орналасқан Әлімқұлов атындағы мектепте болған. Әлеуметтік желіде тараған кадрлардан жалаңаш ер адамның мектеп ғимаратына еш кедергісіз кіріп кеткенін көруге болады.
Желі қолданушылары болған жағдайға алаңдаушылық білдіріп, мектеп әкімшілігі мен жауапты органдардан түсініктеме талап етті. Олардың пікірінше, бөгде адамның оқу орнына осылайша еркін кіруі мектептегі күзет қызметі мен қауіпсіздік шараларының қаншалықты тиімді ұйымдастырылғанына қатысты күмән тудырады.
«Мектеп әкімшілігі мен жауапты органдардан болған жағдайға қатысты түсініктеме беріп, оқу орнында күзет пен ғимаратқа кіруді бақылау жүйесі қалай ұйымдастырылғанын түсіндіруді сұраймыз», – деп жазды желі қолданушылары.
Алматы облысының Полиция департаменті оқиғаға қатысты ресми мәлімдеме жасады. Ведомствоның хабарлауынша, аталған факті бойынша қылмыстық іс қозғалған. Күдікті ұсталып, уақытша ұстау изоляторына қамалған.
Полицияның мәліметінше, оқиға салдарынан оқушылар мен мектеп қызметкерлері зардап шекпеген. Қазіргі уақытта құқық қорғау органдары болған жағдайдың барлық мән-жайын анықтап жатыр.
«Қылмыстық істі тергеу аясында күдіктінің психикалық денсаулығы да тексеріледі», – делінген полиция хабарламасында.
Алдын ала мәлімет бойынша, қылмыстық іс «Бұзақылық» бабы бойынша тіркелген.
Қазіргі уақытта тергеу жалғасып жатыр. Күдіктінің әрекетіне құқықтық баға тергеу нәтижесінде беріледі.
