Кенияда апокалиптикалық секта жетекшісі Пол Маккензи 190 баланың және бір ересек адамның өліміне кінәлі деп танылып, 200 жылға бас бостандығынан айырылды. Сот оған кісі өлтіргені үшін 100 жыл және адамдарды аштыққа жеткізуге байланысты қылмыстар үшін тағы 100 жыл жаза тағайындады.
Маккензи мен тағы 28 адамға секта мүшелеріне балаларын аштан қырып, оларды «Исамен кездесуге» жіберуге бұйрық берген деген айып тағылған. Сот осы оқиғаны әлемдегі деструктивті діни ағымдардан болған ең қасіретті қылмыстардың бірі деп бағалады.
Судья Диана Мочаче Маккензидің «негізгі қылмыстық жауапкершілігі» бар екенін айтты. Оның сөзінше, бұл үкім мұндай зұлымдықтар үшін заңдағы ең қатаң жаза қолданылатынын көрсететін анық белгі болуға тиіс.
Маккензи 2023 жылы Кения жағалауына жақын Шакахола орманынан жасырын қабірлерге көмілген 400-ден астам мәйіт табылғаннан кейін ұсталған. Сот-медициналық сараптама көптеген құрбандардың аштықтан өлгенін, ал кейбірінің тұншығу, қылқындыру немесе бас жарақатынан қаза тапқанын көрсетті.
Кейбір жағдайларда мәйіттердің қатты ыдырауына байланысты өлім себебін анықтау мүмкін болмады. Ал құтқарылғандардың бір бөлігі де қатты әлсірегендіктен, аман қалғаннан кейін көп ұзамай көз жұмған.
Тергеу материалдарына қарағанда, Маккензидің ізбасарлары оны «Иса сөйлеп тұрған адам» деп қабылдаған. Оған қарсы шыққандарды өлімші етіп ұрған. Соттың бағалауынша, өлімдер діни ұстанымдар мен өлімге апаратын оразаны күштеп орындатқан ұйымдасқан жүйенің салдары болған.
