Талқылау барысында мәселе Қазақстан футзал қауымдастығы мен Sport Innovation арасындағы шарттық қатынастарға байланысты екені түсіндірілді. Қазақстан футбол федерациясы бұл жағдайды шешу үшін тараптармен байланыс орнатып, келіссөздердің нәтижелі өтуіне және мәселенің жедел реттелуіне жәрдемдесіп келеді.
Қазіргі уақытта Қазақстан футзал қауымдастығы мен Sport Innovation компаниясы даулы мәселелерді шешуге бағытталған рамалық келісімнің негізгі шарттары бойынша ортақ мәмілеге келген. Келісімнің басты мақсаты – процеске қатысқан барлық тараптың алдындағы қаржылық міндеттемелерді толық өтеу.
Тараптар қаражатты алдымен қосалқы мердігерлерге аударуға келісті. Олар өз кезегінде комментаторларға тиесілі төлемдерді жүзеге асырады.
Алғашқы траншты осы аптаның ішінде аудару көзделген. Бұдан кейін Sport Innovation компаниясы жинақталған берешекті өтеу процесін бастайды.
Скотт Манн кездесуде комментаторларға қалыптасқан жағдай мен оны шешу бағытында атқарылып жатқан жұмыстар туралы толық ақпарат берді. Қатысушылар түсіндірмелерді түсіністікпен қабылдады.
