АҚШ-тың Теннесси штатында әйелге өлім жазасын орындау сәтсіз аяқталғаннан кейін, губернатор штаттағы тағы бір өлім үкімінің орындалуын тоқтатты. Бұл шешім Криста Гейл Пайкқа қатысты оқиғадан соң қабылданды.
Пайкты 1995 жылы жасалған кісі өлтіру ісі үшін өлім жазасына кескен. Алайда оған екі рет өлімге әкелетін дәрі егілгенімен, үкім орындалмаған. Адвокаттарының айтуынша, 50 жастағы Пайк тірі болған және қатты қорылдаған күйде жатқан, кейін жедел жәрдеммен түрмеден шығарылған. Ол ауруханада ем алған, бірақ қорғаушылары оның нақты жағдайы туралы хабарланбағанын айтты.
Оның жазасын 10-да, сәрсенбі күні орындау жоспарланған еді. Егер үкім жүзеге асқанда, ол Теннесси штатында 200 жылдан астам уақыт ішінде өлім жазасына кесілген алғашқы әйел болар еді.
Апелляциялық сот өлімге әкелетін инъекцияны басталардан бір сағат бұрын тоқтатқан, алайда бірнеше сағаттан кейін АҚШ Жоғарғы соты бұл шешімді жойды. Кейін штат губернаторы Билл Ли оқиғаның мән-жайын анықтау үшін «жан-жақты тәуелсіз тексеру» жүргізуді тапсырғанын айтты.
«Заңды түрде шығарылған үкімді орындау — штаттың ең маңызды міндеттерінің бірі. Теннесси тұрғындары оның тек заңды әрі конституциялық түрде ғана емес, тиімді орындалуын да күтеді», — деді Билл Ли.
Штаттың өлім жазасын орындау хаттамасында алғашқы дәрі жиынтығынан кейін тұтқын қайтыс болмаса, екінші жиынтығын енгізу көзделген. Бірақ екінші жиынтықтан кейін де тұтқын тірі қалса, не болатыны құжатта көрсетілмеген.
Өлім жазасы жөніндегі ақпарат орталығының атқарушы директоры Робин М. Махер Пайктің басынан өткен жағдайды «бірегей және бұрын-соңды болмаған» деп атады. Оның айтуынша, бұған дейін тағы жеті адамға тамырға ине енгізу мүмкін болмағандықтан туындаған медициналық қиындықтардан аман қалған, бірақ өлім жазасына арналған дәрілерді алғаннан кейін тірі қалған адам болмаған.
Бұл — биыл Теннесси штатында өлім жазасын орындай алмаған екінші жағдай. Мамыр айында билік 1994 жылы үш адамды ұрлап, өлтіргені үшін сотталған Тони Каррутерстің өлімге әкелетін инъекциясын да тоқтатқан еді. Сол кезде орындаушылар пентобарбитал енгізу үшін көктамырлық катетерді бір сағаттан астам уақыт бойы қоя алмаған.
