Қайғылы оқиға 23 қыркүйекте болған. Полицияның ресми мәліметінше, әйелге пышақ жарақатын оның бұрынғы күйеуі салған. Жәбірленуші алған жарақатынан оқиға орнында көз жұмған. Күдікті ұсталып, уақытша ұстау изоляторына қамалған. Кісі өлтіру фактісі бойынша қылмыстық іс қозғалған.
Оқиғадан кейін Ішкі істер министрлігі қызметтік тексеру жүргізген.
Тексеру қорытындысы бойынша төрт полиция қызметкері жұмыстан шығарылған. Сондай-ақ екі аудандық полиция басқармасының басшылары мен олардың орынбасарлары қызметінен босатылған. Астана қаласы полиция департаменті бастығының орынбасары да қызметінен алынған.
Ал полиция департаментінің бастығына және тағы бір орынбасарына қатаң сөгіс жарияланған.
Қызметтік міндеттерге салғырт қарау фактісі бойынша қылмыстық іс қозғалып, оның аясында жұмыстан шығарылған төрт бұрынғы полиция қызметкері ұсталғаны хабарланды.
Бұған дейін әлеуметтік желілерде күдіктінің құқық қорғау органдарының қазіргі қызметкері екені туралы ақпарат тараған. Астана полиция департаменті бұл мәліметті жоққа шығарған.
Қазіргі таңда әйелдің өліміне қатысты қылмыстық іс бойынша тергеу жалғасып жатыр. Күдіктілердің кінәсін сот анықтайды.
