Қазақстан қаржыгерлері қауымдастығының мәліметінше, өткен аптада KASE-дегі доллар саудасының орташа тәуліктік көлемі 451 млн долларды құрады. Алайда сауда көлемінің өсуіне қарамастан, орташа бағам айтарлықтай өзгермеген. Сарапшылар мұны нарықтағы валюта сұранысы мен ұсынысының салыстырмалы түрде теңгерімді болуымен түсіндіреді.
Теңгеге мұнай бағасы да қолдау көрсетіп отыр. Қыркүйекте Brent бағасы 100 доллардан жоғары деңгейде сақталды. Бұл Қазақстанның экспорттық түсіміне және ішкі нарықтағы шетел валютасының ұсынысына әсер етеді.
Тағы бір фактор — теңгедегі қаржы құралдарының жоғары кірістілігі. Қазақстанда депозиттер бойынша орташа мөлшерлеме шамамен 14,7%-ды құраса, жекелеген өнімдерде 18–19%-ға дейін жетеді. Сарапшылардың пікірінше, мұндай жағдай теңгеге сұранысты арттырып, шетел валютасына деген қажеттілікті төмендетеді.
Сонымен қатар Ұлттық қордан ішкі нарыққа сатылатын валюта көлемі де ұсынысқа әсер ететін факторлардың бірі болып отыр. Алдағы бағамға мұнай бағасы, ішкі сұраныс пен ұсыныс, жаһандық доллар динамикасы және нарық қатысушыларының күтулері ықпал етеді.
Айта кетейік, 21 қыркүйектегі KASE саудасында доллардың орташа сараланған бағамы 448,44 теңгеге дейін көтерілді. Осылайша қысқа мерзімді қозғалыста теңге аздап әлсірегенімен, бір жылдық кезеңде ұлттық валютаның нығаюы сақталып отыр.
