Оқиға Батыс Кордофан штатындағы әл-Нухуд қаласына жақын орналасқан әл-Зара алтын кенішінде болған. Кеніш бірнеше өзара жалғасқан шахтадан тұрады. Опырылу салдарынан шахталар бірінен кейін бірі құлаған.
Жергілікті әкімшілік өкілінің мәліметінше, құтқарушылар 82 адамның денесін шығарған. Сонымен қатар 50 адам жарақат алған. Үйінді астында қалғандардың нақты саны әзірге белгісіз.
Құтқару жұмыстары жалғасып жатыр. Алайда оқиға орнында арнайы техника мен кәсіби құтқару топтарының жетіспеуі жұмыстарды қиындатып отыр. Тірі қалған кеншілердің айтуынша, адамдарды іздеу жұмыстарына негізінен қарапайым құралдар қолданылған.
Әл-Зара кенішінде жұмысшылар тиісті қауіпсіздік талаптары сақталмайтын бейресми жағдайда алтын өндірген. Батыс Кордофан аймағын Судан армиясымен соғысып жатқан Жедел қолдау күштері (RSF) бақылауда ұстап отыр.
Құтқару жұмыстары аяқталған жоқ, сондықтан құрбандар саны әлі де өзгеруі мүмкін.
